რუსეთის ეროვნული უშიშროების საბჭოს თავმჯდომარის მოადგილე, დმიტრი მედვედევი უკრაინული დრონების მიერ რუსეთზე 1 ივნისს განხორციელებულ მასშტაბურ თავდასხმებს მუქარით პასუხობს და ამბობს, რომ რუსეთი ემზადება საპასუხო თავდასხმისთვის, რომელიც განამადგურებელი იქნება.

“ცეცხლთან თამაში ჯოჯოხეთში დასრულდება… პასუხი უბრალოდ ასიმეტრიული არ იქნება. ის გამანადგურებელი იქნება. ვიცით, სად იღებენ გადაწყვეტილებებს, სად სხედან ისინი, ვისაც ჰგონიათ, რომ ბრძოლა სხვისი ხელით შეუძლიათ. დავარტყამთ იქ, სადაც ყველაზე ნაკლებად ელოდებიან. თავაზიანი ფორმულირებების დრო დასრულდა. ახლა მხოლოდ ფოლადი, ცეცხლი და ზუსტი განადგურება. დაე ილოცონ. თუმცა მათ არავინ დაეხმარება. არც NATO, არც ეშმაკი.” – აცხადებს მედვედევი.

შეგახსენებთ, 1 ივნისს უკრაინის უსაფრთხოების სამსახურმა ერთდროულად იერიში მიიტანა რუსეთის ფედერაციის ოთხ სამხედრო აეროდრომზე.
თავდასხმა რუსეთმაც დაადასტურა და თქვა, რომ უკრაინამ დარტყმები განახორციელა ხუთ რეგიონში.

BBC წერს, რომ დაზიანებულია 40-ზე მეტი თვითმფრინავი, მათ შორის – А-50, ТU-95, და ТU-22 М3. ინფორმაცია ჯერჯერობით არ დადასტურებულა დამოუკიდებელი წყაროების მიერ, ხოლო გადამოწმება ომის პირობებში შეუძლებელია.

აღსანიშნავია, რომ ოპერაცია უკრაინის პრეზიდენტი, ვოლოდიმირ ზელენსკი აკონტროლებდა, ხოლო აღსრულება უკრაინის უსაფრთხოების სამსახურის უფროსს, ვასილი მალიუკს დაევალა.