გორში, ცაბაძის ქუჩაზე ახალგაზრდა მამაკაცის ცხედარი იპოვეს. შსს-ს ცნობით, გამოძიება ამ ეტაპზე სსკ-ის 108-ე მუხლით მიმდინარეობს, რაც განზრახ მკვლელობას გულისხმობს, თუმცა სამედიცინო ექსპერტიზის პირველადი მონაცემების გათვალისწინებით, მუხლი შესაძლოა გადაკვალიფიცირდეს.
“მომხდართან დაკავშირებით, გამოძიება ინტენსიურად მიმდინარეობს და ტარდება ყველა საჭირო საგამოძიებო მოქმედება. აქვე მოგახსენებთ, რომ ზოგიერთი მედიასაშუალებით გავრცელებული ინფორმაცია, რომლის მიხედვითაც თითქოს ცხედარს აღენიშნება ცივი იარაღით მიყენებული დაზიანებები, არის სიცრუე.
შინაგან საქმეთა სამინისტრო მოუწოდებს მედიის წარმომადგენლებს, თავი შეიკავონ გადაუმოწმებელი ინფორმაციის გავრცელებისგან და დაელოდონ საქმეზე მიმდინარე გამოძიების შედეგებს”,- ნათქვამია ინფორმაციაში.
გარდაცვლილი ახალგაზრდა გორის მე-11 საჯარო სკოლის მე-11 კლასის მოსწავლე, გივიკო გიგოლაშვილია.
მოზარდის ახლობლები ამბობენ, რომ მომხდარი მკვლელობაა.
“დღეს მე მოსწავლე მომიკლეს სიყვარულის, სიმშვიდის და ერთგულების ბიჭი…. მტკივა , ძალიან მტკივა”
“ცხოვრება წამებში ინგრევა … და ამ წამებმა დღეს უდანაშაულო ბიჭს სიცოცხლე წაართვეს. მოკლეს ჩემი შვილის ბავშვობის მეგობარი… კლასელი… ისეთი თბილი, ზრდილობიანი და გულით სუფთა ბიჭი ვერ აღვწერ, რა იგრძნო ჩემმა შვილმა, როცა გაიგო… გული მეგლიჯება, როცა ვუყურებ მის ტკივილს… ტკივილს, რომელსაც სიტყვები ვერ ატევს. სადამდე უნდა მივიდეთ, რომ ადამიანებმა კაცობა მკვლელობაში არ აგვერიოს? სად არიან კანონები, როცა ყველაზე მეტად სჭირდება სამართლიანობა შვილდაკარგულ მშობლებს?!” – წერენ დაღუპული ბიჭის ახლობლები/
„პრაიმტაიმი“ რამდენიმე ადგილობრივს ესაუბრა.
„არ ვიცი, მკვლელობა იყო თუ რა. მე უბრალოდ ცხედარი დავინახე. ვინაობა არ ვიცით. სისხლი ახლაც ჩანს ძირს. შეიძლება დავარდნის დროს დაარტყა თავი, ზუსტად ვერ გეტყვით…
დილით რომ ჩამოვედი და ძირს დაგდებული ვნახე, შოკი მივიღე, ღმერთო, ნეტა არ დამენახა. თვალებიდან არ ამომდის. ამაზე დიდი საშინელება არ მინახავს“, – გვიყვება ერთ-ერთ ადგილობრივი.
ცხედარი ამ დროისთვის ექსპერტიზის ბიუროშია.
